ކައިވެނި

ކައިވެންޏަކީ އިސްލާމް ދީނުގައި އެގުޅުމަކަށް ނުހަނު ބާރު އަޅުއްވާފައިވާ ގުޅުމެކެވެ. ކައިވެނި ކުރުމުގެ ކުރިން ފިރިހެންމީހާ އާއި އަންހެންމީހާ ސަމާލުކަން ދޭންޖެހޭ ކަންތައްތަކެއް އިސްލާމް ދީނުގައި ވަނީ ކަނޑައަޅުއްވާފައެވެ. އެގޮތުން ކައިވެނި ކުރަން ބޭނުންވާ އަންހެން މީހާއަކީ ރީތި، މުދާވެރި، ޙަސަބާއި ނަސަބުގެ ގޮތުން ރަނގަޅު ޢާއިލާއަކަށް ނިސްބަތްވާ އަދި ދީންވެރި މީހެއްތޯ ބެލުމަކީ އިސްލާމްދީން އެކަންކަމަށް ބާރުއަޅާފައިވާ ކަންކަމެވެ. މީގެ ތެރެއިން އެންމެ މުހިންމު ސިފައަކީ އަދި ޝަރުތަކީ ދީންވެރި އަންހެނެއްކަމުގައި ވުމެވެ. ބައެއްފަހަރު އަޅުގަނޑުމެންނަށް ހީވެފައި އޮންނަނީ މަތީގައި ދެންނެވުނު ހުރިހާ ސިފައެއް ނުވަތަ ޝަރުތު ތައް އެމީހެއްގެ ކިބައިގައި ނެތްނަމަ ދީނުގައި ވާ މިންގަނޑަށް އެމީހަކު ނުފެތޭކަމަށެވެ. ނަމަވެސް ޙަޤީޤަތަކީ އެ ހުރިހާ ކަމެއް ފުރިހަމަ ވާން ނުޖެހޭ ކަމާއި އޭގެތެރެއިން އެންމެ މުހިންމު ޝަރުތަކީ އަންހެންމީހާއަކީ ދީންވެރި މީހެއްކަމުގައި ވުމެވެ. ހިތާމައަކީ މިހާރަކަށް އައިސް އަޅުގަނޑުމެންގެ ދިވެހި މުޖުތަމަޢުގައި، މަތީގައި ދެންނެވުނު އެންމެ މުހިންމު އަދި އެ ޝަރުތު ފުރިހަމަ ނުވާނަމަ، ކުރެވޭ ކައިވެންޏާއި އެކައިވެންޏަށް ލިބޭ ދަރިންގެ ތަރުބިއްޔަތުވެސް ކަސިޔާރުވެގެން ހިނގައިދާނެ ޝަރުތުކަމުގައިވާ އަންހެންމީހާގެ ދީންވެރިކަމަށް އެއވެސްވަރަކަށް ސަމާލުކަން ނުދޭ ކަމެވެ. މިހާރަކަށް އައިސް ހަމައެކަނި އަންހެންމީހާގެ ޙަސަބާއި ނަސަބަށް، ރީތި ކަމަށް އަދި މުދާވެރިކަމަށް ބެލުމަށްފަހުގައި ރީތި ތާރީޚެއްގައި ކައިވެނި ކުރެވޭތޯ ބެލުމަކީ ފެޝަނަކަށް މިވަނީ ވެފައެވެ. ކުރެވޭ ކައިވެނި މަތީގައި ޢުމުރުގެ ބާކީ ހޭދަކުރެވޭތޯ ގަދައަޅާ މަސައްކަތް ކުރުމުގެ ބަދަލުގައި އަހަރުގެ ރީތި ތާރީޚެއްގައި ކައިވެނި ކުރުމަށް އަވަސްވެގަތުމުގެ ނަތީޖާއަކަށް ވެފައި މިއޮންނަނީ ކައިވެންޏަށް އަހަރު ނުވަނީސް ދެމަފިރިން ވަކިވާންޖެހިފައެވެ. އަޅުގަނޑުމެންނަކީ ކުރާ ކޮންމެ ކަމެއްގައިވެސް ދީނުގައި އެކަމެއް ކުރުމަށް އިރުޝާދު ދެއްވާފައިވާ ގޮތަށް ކުރުމަށް ސަމާލުކަން ދޭ ބައެއްކަމުގައި ލައްވާށި! އާމީން! އެފް.އޭ. އޮންލައިން