Category: ސިޔާސަތު

މަތީގައި އެވާ ތަޞްވީރުގައި އެވާ ލިއުންކޮޅު، އަޅުގަނޑުގެ ސުރުޚީކަމުގައި ޚިޔާރު ކުރީ، އޭގައިވާ ގޮތަށް އޭގައި އެބަޔާން ކުރާގޮތަށް އަޅުގަނޑުމެންގެ ތެރޭގައި ކަންކަން ނުދާކަން ފާހަނގަ ކުރުމުގެ ގޮތުން. ބެނާ ތހަކާއި ޕޯސްޓަރު ތަކުގައި ހަމައެކަނި ލިއުމަކުން ފެންވަރު ރަނގަޅު ތަޢްލީމުގެ ބޭނުމެއް ޤަވްމު ބިނާކުރުމުގެ މައިދާނުގައި ނުފެންނާނެ. އެކަން އެގޮތަށް ހިނގާނީ ޤަވްމު ބިނާކުރުމުގެ ދާއިރާގައި ޙަރަކާތްތެރިވާ ބޭފުޅުންނަކީ ހަރުދަނާ، ތަޢްލީމީ އަދި ޤާބިލު ބަޔަކަށް ހެދިގެން. އެކަމަށޓަކައި ފައިސާއަށް ވޯޓު ވިއްކުން ނިމުމަކަށް ގެންނަން ޖެހޭ. ޔަޤީނުންވެސް ފެންނާން އޮތް ޙަޤީޤަތަކީ، ފާއިތުވި 15 އަހަރު ތެރޭގައި މި ރާއްޖޭގައި ބޭއްވިފައިވާ އިންތިޚާބުތަކުން އަޅުގަނޑުމެން ރައްޔިތުން ވޯޓު ދީގެން ހޮވާފައިވާ ސިޔާސީ ބޭބޭފުޅުންގެ ތެރެއިން ބޮޑު މެޖޯރިޓީއަކީ މަތީގައި އެވާ ބެނާގައި ވާ ފަދަ ތަޢްލީމެއްގެ ސބަަބުން ހޮވާފައިވާ ބޭފުޅުންނެއް ނޫންކަން. އެހެންކަމަށްވާނަމަ، އަޅުގަނޑުމެން މިއަދު ފުންކޮށް މިކަމާ ވިސްނާ ކުރިއަށް އޮތް ރިޔާސީ އިންތިޚާބުގައި ފައިސާއަށް ވޯޓު ވިއްކުން ނިމުމަކަށް ގެންނަން ޖެހޭ. ދުޢާއަކީ އަޅަމެންގެ މައްޗަށްއިސްލާމީ އުޞޫލުތަކުގެ މަތިން ހެޔޮ ވެރިކަމެއް ކުރާނެ ވެރިންތަކެއް އިޚްތިޔާރު ކުރުމުގެ ހެޔޮ ތައުފީޤު އަޅަމެންނަށް ދެއްވުން. އާމީން

2023 ވަނަ އަހަރުގެ ރިޔާސީ އިންތިޚާބު ބޯމަތިވެގެން އަންނައިރު ބައެއްފަހަރު އިވޭ އަޑަކީ ‘ތިމަންނަ ވޯޓު ލާން ބޭނުންވާ އެއްވެސް ކެންޑިޑޭޓެއް ނެތޭ. އެހެންވީމާ ނުވެސް ދާނަމޭ ވޯޓު ލާން’ ބުނާ އަޑު. މި ވިސްނުމަކީ އެއްވެސް ޙާލެއްގައި ރަނގަޅު ވިސްނުމެއް ނޫން. ސަބަބަކީ އެންމެ ބޭނުންވާ ކެންޑިޑޭޓު ނެތް ނަމަވެސް، ކުރިއަށް އޮތް 5 އަހަރު ޤަވްމު ހިންގުނުގެ ސިޔާސަތުތައް ކަނޑައަޅާ ހިންގުމުގެ މަސްއޫލިއްޔަތު ޙަވާލު ކުރެވޭ ވެރިއަކީ ވީހާވެސް ގިނަ ބައެއްގެ ރުހުން އޮތް މީހަކަށް ހެދުމަކީ މުހިންމު ކަމަކަށް ވާތީ.

އަޅުގަނޑުމެންނަކީ ސައްތައިން ސައްތަ މުސްލިމް ޤަވްމަކަށް ވާތީ، އަދި އަޅުގަނޑުމެންނަކީ އިސްލާމްކަން ހިތުގެ އަޑިން ޤަބޫލު ކޮށްގެން ތިބިބބަޔަކަށް ވާތީ، ވެރިއަކު އިޚްތިޔާރުކުރުމުގައި އަޅުގަނޑުމެން އެންމެ ފުރަތަމަވެސް ބަލަން ވާނީ އިސްލާމީ ވެރިކަމެއް އޭގެ ފުރިހަމަ މާނައިގައި ކޮށްދޭނެ ވެރިއަކު ހޮވުމަށް. މިއީ އަޅުގަނޑުމެންގެ ތެރެއިން ހަމަ ކޮންމެ މީހެއްގެ ބޮލުގައިވެސް އެޅިފައިވާ ވަރަށް ބޮޑު މަސްއޫލިއްޔަތެއް. އެންމެ ބޮޑު އިސްކަމެއް ދޭން ޖެހޭނީ އެމަގަށް ވަޢުދުތައް ވާ ބަޔަކަށް ވެރިކަން ޙަވާލު ކުރުމަށް. ކާއިނާތުގެ ވެރި އިލާހުގެ ޙުކުމް ވަރަށް ސާފު. ކާމިޔާބު ބަޔަކަށް ވާން ބޭނުން ނަމަ الله ގެ ދީނުގައި ހިފަހައްޓައިގެން މެނުވީ އެކަން ނުވާނެ. އިސްލާމް ދީނުގައި ވާ ގޮތް ނޫން ގޮތެއް ވެރިކަމުގެ ފަރާތުން ޚިޔާރު ކޮށްފި ނަމަ އެއީ އެބަޔަކު ދެދުނިޔޭގެ ހަލާކަށް ހުށަހެޅިދާނެ ކަމެއް.

ވީމާ، ލޮބުވެތި ރައްޔިތުން މިފަހަރު ވޯޓު ވިއްކާނުލައްވާ، الله ދެއްވާފައިވާ މަތިވެރި ނިޢުމަތް ކަމުގައިވާ ބުއްދީގެ ބޭނުން ހެޔޮ ގޮތުގައި ހިއްޕަވާ، ދީނާއި ޤަވްމަށް އެންމެ ފައިދާ ހުރިމަގަށް ވިސްނުން އިސްކޮށް 2023 ވަނަ އަހަރުގެ ސެޕްޓެމްބަރު މަހުގެ 9 ވަނަ ދުވަހު އޮންނަ ރިޔާސީ އިންތިޚާބުގައި ވޯޓު ދެއްވުމަށް ނުހަނު އިޚްލާޞްތެރިކަމާއި އެކު އިލްތިމާސް ކުރަން